الخميس، 20 يونيو، 2013

حــدثـتني نفســي ،، !

فاكر لما كنت صغير ، أد ايه كنت شقي و أد ايه كنت شاطر ، من صغرك كنت موهوب وربنا اداك العقل عشان تسخره لحلمك ومستقبلك ، طب فاكر في اول سنة ليك في المدرسة لما مامتك قالتلك تعالي لما ألبسك الهدوم الجديدة اللي جبتهالك وتسرحلك شعرك وتديك شنطتك ومصروفك ؟ فاكر انت قولتيلها ايه ساعتها ؟؟ - ماما يعني ايه مدرسة ؟ وهي تقولك دي يا حبيبي اللي هتتعلم فيها لحد ما تكبر وتتخرج وتطلع دكتور اد الدنيا كلها ،،،، !

كانت قوة تأثير الكلمة دي فيك كافية انك تحب المدرسة من قبل ما تشوفها كنت حاسس ان دا بيتك اللي هتعيش فيه حياتك بعد ما دخلت ابتدائي ، ومرت الايام عليك وكل يوم بتحب المدرسة أكتر وأكتر ، كنت دايما متفوق وشاطر وبتطلع الاول علي طول كمان كانوا الاساتذة بتوع بيحبوك أوي وكانوا بيقولولك انت هتبقي دكتور كبير وربنا هيكرمك انت بجد تستحقها ، كنت دايما بتحبب الاستاذ انه يديك معلومات اكبر من سنك ويفهمك مرة واتنين عشان هو عارف انه هيلاقي نتيجة من معلوماته اللي بيديهالك ،،، !

فاكر صحابك ؟؟ - فاكر اد ايه كانوا بيحبوك وأد ايه كانوا بيقولوا عليك شاطر ومتفوق ؟؟ كنتوا بتحبوا بعض جدا وكانت المنافسة بينكوا جميلة بس دايما كنت بتغلب في النهاية ! ،،، رغم صغر سنكوا دا بس الواحد يفكركوا ولاد 20 سنة بجد !

فضلتوا تتنافسوا مع بعض طول فترة الابتدائي والاعدادي والثانوي كنتوا مقربين من بعض أوي ، طب كنت فاكر لما كنت بتتنطط عليهم وتجيبلهم اسئلة صعبة وهم مبيعرفوش يحلوها ! ،، آه نسيت أقولك حاجة ! مش بس كنت شاطر في الدراسة انت كمان كنت أحسن واحد بيقدم اذاعة للمدرسة وكنت دايما أمين الفصل ومسئول عنه وكنت أكتر واحد بيطلع مسابقات وحفلات ،، سبحان الله أد ايه كنت متفوق ،،، !

انت وصحابك واللي كنتوا بتعملوا في المدرسة والدروس ميقولش ان دول طلاب من كتر الشقاوة بجد بس في وقت الجد كنتوا تشرفوا أي حد يطلبكوا ، كنتوا معرفوين بالجهابزة ، هو آه كنتوا مكروهين من باقي اصحابكوا الا ان انتو كنتوا بتخافوا علي بعض أوي وبتحبوا بعض وبتساعدوا بعض في كل حاجة وهعيدها عليك تاني ! ،، كنت إنت أفضلهم ،، !

حطيتوا لبعض مستقبل واحد تمشوا عليه  ،، ومرت نهاية الثانوية بخير وقعدتوا تستنوا النتيجة ومن كتر الهزار كنتوا بتقسموا لبعض الكليات وكدا ومكنش عند حد اي شك انه يقولك انت لايق عليك كلية الطب ! ،، ومرت الأيام وشاءت عدالة السماء ان تقسم الرزق والنصيب والمكتوب ،، وشاء الله ان يدخلك كلية ابعد ما يكون عن حلمك ومستقبلك ! أكتر كلمة انت قولتها الحمد لله وقدر الله ،، ربنا مدنيش حلمي ومستقبلي بس اداني الصبر والقناعة ! فاكر لما قعدت توهم نفسك بإنك خلاص ضعت وضاع كل حاجة ؟ - ساعتها ربنا رد عليك وقالك لأ انا بمتحن رضاك وانت بجد أثبتله كدا 

رغم كمية الحزن اللي غمرتك وقتها ! طلعت متساويش ذرة من كمية الفرحة والسعادة اللي غمرتك لما عرفت ان صحاب عمرك دخلوا كلية القمة ،، اه متستغربش ان انت كنت أحسن منهم ! بس لكل مجتهد نصيب وقول الحمد لله وكمل طريقك و إياك تغفل او تتجاهل الدعاء لله وإتأكد كويس إن مستقبلك لسه في ايدك وبجد انت تقدر تحقق حاجات تتفوق علي نفسك بيهـآ ،،، ! الحمد لله#

الأحد، 16 يونيو، 2013

أسلـــوب حيــــــآة !

عندنا في مصر جملة مشهورة أوي يقولك ايه " بفلوسي ،، يا جدع " بس مفيهاش مشكلة خالص الجملة دي ، هي المشكلة ممكن في طريقة نطقها وفي الموقف اللي اتقالت فيه ! ، أصلنا بنحب نتباهي بالغلط أوي ، يعني ببساطة اللي معاه فلوس شايف نفسه الكل في الكل ويقدر يعمل بيها أي حاجة يتمناها بغض النظر عن شهادته أو مكانته الاجتماعية أو .. أو .. أو ... ! وطبعا إلا من رحم ربي .

متستغربش طفل ولا بنت صغيرة يقولولك انا بابا معاه فلوس كتير وأغني منك ، هنا البرءاة بتمثل كل معاني الجملة دي ولكن ،،
لما تسمع راجل كبير يقولك انا بفلوسي اقدر اشتري و أشفي و أموت و أعيش ! دي بقي اللي بتكلم عليها و هديكوا بعض الامثلة الحياتية اللي الكل ممكن مش بياخد باله منها ،، !


أهلا إزيك يا صاحبي عامل ايه وحشني والله ؟؟ - أنا تمام الحمد لله والله انت فين كدا انا سمعت انك دخلت علوم وكدا ؟؟ - أها الحمد لله النصيب بقي بس انا سمعت انك جايب 84% معلش بقي متعوضة - عادي يا عم كبر دماغك انا هروح أقدم في كلية اسنان خاصة وهبقي احسن من الكل ومحدش هيقدر يتكلم معايا ! - أها طب ربنا يكرمك و ادعي بقي ربنا يوفقك في الكلية دي هي كانت حلمك ولا ايه ؟؟ - لا يا عم مش حلم ولا حاجة بس انا مبحبش حد يكون اعلي مني في اي حاجة انا بفلوسي اقدر اكون فوقكوا كلكوا عادي يعني ! - اها اذا كان كدا يبقي ربنا يهديك مش يوفقك ! - يلا انا ماشي بقي ومتنساش تسلملي علي علوووووم ،،، !

مالك يا صاحبي زعلان كدا ليه ؟؟ - مفيش بس فشلت في اختبار الحربية ! - يا عم خير الحمد لله يمكن ربنا كاتبلك مستقبلك في حاجة أحسن متزعلش ! - اها طبعا و نعم بالله بس اللي مزعلني اني مش لاقي سبب اني ما قبلتش ؟! - يمكن يكون فيه حاجة بسيطة عيب بس انت مش واخد بالك أو كدا واها صحيح هو الواد محمد عمل ايه قبل ولا لأ دا هو كمان نظره ضعيف و متعور من صغره تقريبا ؟؟ - لأ أنا مفيش حاجة و الله بس لقيت نفسي بيتقالي انت راسب و مشوني وخلاص و محمد قبل يا عم انت متعرفش ان عنده واسطة ولا ايه سيبك من نظره والحاجات دي ! - إنت بتتكلم ازاي يا عم انت !؟- اها والله نجح يا عم و دفع 100 ألف جنيه و الموضوع مشي وخلاص و قابلني النهاردة قولتله انت ازاي نجحت رغم ان انا أحق منك ؟؟ - قـالي بفلوسي يا جدع ،،،، !

بابا بابا هو انت هترشح مين في مجلس الشعب من دايرتنا ؟؟ - هرشح بتاع حزب الهداية راجل تقي و خدوم والناس كلها بتشهد بيه و يستحقها عن جدارة ! - طب هو مين اللي مترشح قصاده ؟؟- فيه واحد من حزب الكنبة بس قليل أوي اللي هيرشحه أصله معملناش حاجة المرة اللي نجح فيها و ضحك علينا ! - طب ماشي يا بابا انا كمان هروح انتخب بتاع حزب الهداية زيك وخلاص ،، و مر أسبوع وجاء اعلان النتيجة ؟ - بابا بابا هو مين اللي كسب بقي ؟؟ - مرشح حزب الكنبة يا حبيبي بيقولك اخر 3 صناديق أنقذوه ! - إزاي يعني يا بابا وانا كل ما أسأل حد يقول انتخبت مرشح الهداية ! - اها بقي يمكن ادي للناس فلوس عشان تنتخبه وكدا طب انا عارف ابنه هروح أسأله هو أبوك نجح إزاي ؟؟ - انت يا ابني ابوك نجح إزاي ؟؟ - يا عم زي كل مرة وزع فلوس علي الناس و وزع رشوة علي بتوع حزب الكنبة الكبار عشان هم اللي ماسكين البلد وكدا عادي يعني ؟ - طب أبوك إزاي يعمل كدا ؟؟ - بفلوسه يا جدع ،،، !

خلاصة الكلام ، فيه ناس مش بس عندها حياتها صحة و سعادة ورضا ربنا لأ كمان فلوس و مناصب بالرشوة و أخذ حق الغير والمشكلة انهم دايما بيحسدوا الفقرا و حاقدين علي الفرحة و السرور و الراحة اللي هم فيها ! أصلهم لسه ميعرفوش حاجة اسمها القناعة ،، ( و في السماء رزقكم و ما توعدون ) صدق الله العظيم . الفلوس في زمنا دا يا ابني بقت أسلوب حياة و ما من عــــــزاء !

الخميس، 13 يونيو، 2013

عــآلمـ تعبآنة !

آه تعبــانة ، مش بغلط فيهم ولا حاجة بس يمكن تقول كدا مفيش وصف لايق عليهم غير كدا ، آه حاولت أفهم تفكيرهم و كلامهم وعشان كدا وصفتهم . متفهمش ليهم رأي كدا بس تفهم انهم مع التيار فين ما يروح ، آه مأجورين بس مش كلهم ! عرفت بقي هم بيعملوا كدا ليه و غرضهم ايه ؟! , هو انت بتتكلم عن مين بالظبط ؟

عن اللي بيحاربوا البلد لمجرد فكر متطرف هم أصلا مش مؤمنين بيه ، عن اللي يقولوا شمال لأي يمين صح , عن اللي ربنا مش غافل عنهم و عن أعمالهم , عن سبب حزن آلاف من البسطاء و الفقراء والدموع في عيونهم .

آه عرفت هم مين ؟ تقصد الفلول صح ؟ ماهو مفيش غيرهم فاسدين و ممكن الإخوان برده ,, !
هو دا تمامك ! متعرفش عن المصريين غير فلول و اخوان , تعرف إنك فاسد بسؤالك دا ! أصلك مش واخد بالك من حاجة فكر كدا للحظة بس بعكس ميولك هتلاقي نفسك زيك زيهم , المشكلة مش في إخوان و فلول و معارضة المشكلة في المصالح الشخصية و الأهواء علي حساب دين ماشي أبرياء ماشي فساد دولة ماشي , عند الناس اللي أقصدهم كله ماشي أصل التعبـان شايف نفسه صحيح الآخر !

عارف إنت اللي بيكره الخير لبلده ، تعبان# طب عارف اللي باع دينه و مبادئه عشان منصب , تعبان# طب عارف اللي طلب الشهرة علي حساب بخس غيره , تعبان# طب عارف كمان اللي قول يوم يوعد بالدهب وهو مش لاقي حديد , تعبان#

يعني الخلاصة إنك عايش في عالم تعبان محدش عارف بيعمل ايه ولا بيقول ايه ، ناس قتلت وسرقت عشان منصب وناس ضدهم قتلت و سرقت عشان يحافظوا علي نفس المنصب ! طلبوا الإمارة وهم قادرون عليها بس تقول ايه بقي للأهواء والمطامع لأ وتقول ايه كمان عن المغرضين اللي مهما تتكلم عليهم مينفعش في كلامك تاخد حسنات ! ، دول كل يوم بحملات و حركات و تحريضات طب ليه يا عم بتعمل كدا ؟ عشان رئيسك هو السبب ، هو اللي بوظ البلد من الاول واللي معاه بيساعدوه دول مفكرنها تكية ولا عزبة بس احنا مش هنسيبها لهم أبدا طول ما احنا عايشين ، و هننزل يوم 30\6 عشان نرجع البلد المسلوبة و نجيب حق الشهداء ونمشي عجلة البلد من جديد ،  تصدق انا لما قولت عليك تعبان كان وصف خفيف عليك ! أنا مش مشفق عليك ولا حاجة إطلاقا بس هسألك كام سؤال كدا و تجاوبني . إنت بتحب أهلك ؟ عارف بعد يوم تظاهرك دا لو حاجة حصلت هترجع لهم أو لأ ؟ إنت كدا شهيد ؟ إنت كدا بترضي ربنا ؟ إنت كدا حققت نصر ؟ إنت كدا غيرت واقع ؟ ، يا عم افهم انت مضحوك عليك متبقاش تعبان ، لأ دي وجهة نظرك و تحترم بس مش هنتخلي عن أهدافنا و حقنا لازم يرجع ؟

طب خليك بقي كدا و شوف بكرة مين اللي هيبكي عليك ! بس أصل العيب برده مش عليك العيب علي التعبان اللي زيك اللي سابك تعمل فيه كدا ، إسقاط#